காசா இனப்படுகொலை நடந்தபோதிலும் இஸ்ரேலுடனான ஆயுத வர்த்தகத்தைத் தொடர இந்தியாவின் ராகுல் காந்தி ஆதரவு
காசா மீதான போர் குறித்து சர்வதேச அளவில் கடும் கண்டனம் எழுந்தபோதிலும், புது தில்லி அந்நாட்டுடன் வலுவான மூலோபாய
உறவுகளைப் பேண வேண்டும் என்று கூறி, இஸ்ரேலுடனான தொடர்ச்சியான இராணுவ ஒத்துழைப்பை இந்தியாவின் எதிர்க்கட்சித் தலைவர் ராகுல் காந்தி ஆதரித்துள்ளார்.
புதன்கிழமை சிகாகோ பல்கலைக்கழகத்தில் அரசியல் விஞ்ஞானி ராபர்ட் பேப்புடன் நடந்த கலந்துரையாடலின்போது இந்திய தேசிய காங்கிரஸ்
தலைவர் இந்தக் கருத்துக்களைத் தெரிவித்தார். அப்போது அவர் உலக விவகாரங்களில் இந்தியாவின் நிலைப்பாடு குறித்துப் பேசினார்.
“இஸ்ரேலுடன் எங்களுக்கு நல்ல உறவுகள் உள்ளன, நாங்கள் அவர்களிடமிருந்து ஆயுதங்களை வாங்குகிறோம்,” என்று காந்தி கூறினார்.
“இஸ்ரேலுடன் நல்ல உறவுகளைப் பேணுவதை நான் முழுமையாக ஆதரிக்கிறேன்.”
இஸ்ரேலுடன் இராணுவ உறவுகளைப் பேணுவதற்கு இந்தியாவுக்கு மூலோபாயக் காரணங்கள் உள்ளன என்று அவர் வாதிட்டார். மேலும், மற்ற நாடுகளின் முன்னுரிமைகளால் தனது வெளியுறவுக் கொள்கை
தீர்மானிக்கப்படுவதை அனுமதிப்பதை விட, தனது ஆயுதப் படைகளுக்குச் சிறந்ததாகக் கருதும் ஆயுதங்களைப் பெறுவதற்குப் புது தில்லி சுதந்திரமாக இருக்க வேண்டும் என்றும் அவர் கூறினார்.
காசாவில் இஸ்ரேலின் நடவடிக்கைகளை காந்தி சுருக்கமாகக் கண்டித்தார், ஆனால் 2023 அக்டோபர் 7 அன்று ஹமாஸ் தலைமையிலான தாக்குதல்களைக்
கடுமையாகச் சாடி, பொதுமக்கள் கொல்லப்பட்டது ஏற்றுக்கொள்ள முடியாதது என்று கூறினார்.
“ஆனால், 150 கோடி மக்கள்தொகை கொண்ட நாம் ஒரு மிகப் பெரிய நாடு. நமது வெளியுறவுக் கொள்கையானது, மற்றவர்களுக்கு எது நல்லது என்பதை
அடிப்படையாகக் கொண்டிருக்காமல், நமக்கு எது நல்லது என்பதை அடிப்படையாகக் கொண்டிருக்க வேண்டும்,” என்று அவர் மேலும் கூறினார்.







