283 மில்லியன் ஒதுக்கிய அனுரா
283 மில்லியன் ஒதுக்கிய அனுரா இந்த ஆண்டுக்குள் 200,000 அஸ்வெசும பயனாளிக் குடும்பங்களை ஆக்கப்பூர்வமான பொருளாதார நடவடிக்கைகளுக்கு மாற்றி,
அவர்கள் நல உதவிகளைச் சார்ந்திருப்பதை குறைப்பதற்கான திட்டங்கள் செயல்படுத்தப்பட்டு வருவதாகவும் தெரியவந்துள்ளது.
16,000 குடும்பங்களுக்கு உளவியல், சமூக மற்றும் பொருளாதார ஆதரவை வழங்கும் திட்டங்கள் ஏற்கனவே தொடங்கப்பட்டுள்ளன என்று அதிகாரிகள் தெரிவித்தனர்.
குறைந்த வருமானம் ஈட்டுபவர்களை நீண்டகாலம் மானியங்களைச் சார்ந்திருப்பதை விடுத்து,
ஆக்கப்பூர்வமான வேலை வாய்ப்புகளை நோக்கி நகர்த்துவதன் முக்கியத்துவத்தை ஜனாதிபதி திசாநாயக்க
எடுத்துரைத்தார். தோட்டத் தொழில் போன்ற துறைகள் பகுதிநேர வேலை வாய்ப்புகளை வழங்கக்கூடும் என்றும் அவர் சுட்டிக்காட்டினார்.
ஊனமுற்றோர், முதியோர், அல்லது நாள்பட்ட நோய்களால் பாதிக்கப்பட்டு, பணியாளர் தொகுப்பில் பங்களிக்க முடியாத குடும்ப
உறுப்பினர்களைக் கொண்ட குடும்பங்கள் தொடர்ந்து அரசாங்க உதவியைப் பெறும் என்று ஜனாதிபதி கூறினார். இருப்பினும், நல
உதவிகளைப் பெறும் உடல் தகுதியுள்ள தனிநபர்களின் பங்களிப்பும் நாட்டின் உற்பத்தி செயல்முறைக்கு செலுத்தப்பட வேண்டும் என்று அவர் வலியுறுத்தினார்.
ஒருங்கிணைப்பு இல்லாமல் அமைச்சகங்கள் தனித்தனி நிதித் திட்டங்களைச் செயல்படுத்த அனுமதிப்பதற்குப் பதிலாக, ஒவ்வொரு
குடும்பத்தின் குறிப்பிட்ட தேவைகளையும் கண்டறிய ஒரு குடும்ப அபிவிருத்தித் திட்டத்தைத் தயாரிக்குமாறு அவர் அதிகாரிகளுக்கு மேலும் அறிவுறுத்தினார்.
ஆசிய அபிவிருத்தி வங்கி மற்றும் உலக வங்கி உள்ளிட்ட சர்வதேச அபிவிருத்திப் பங்காளிகளால் ஆதரிக்கப்படும் அதிகாரமளித்தல்
திட்டங்கள் மற்றும் அரசாங்க நிதியுதவித் திட்டங்கள் குறித்தும் இந்தக் கலந்துரையாடலில் கவனம் செலுத்தப்பட்டது.
பணியாற்றும் தாய்மார்கள் மற்றும் மாற்றுத்திறனாளி குழந்தைகளுக்காகத் திட்டமிடப்பட்ட 10 பகல்நேரப் பராமரிப்பு மையங்களை இந்த ஆண்டிற்குள் நிறைவு செய்யுமாறும்,
வரும் ஆண்டுகளில் நாடு முழுவதும் இதுபோன்ற 50 மையங்களை நிறுவுவதற்கான திட்டங்களைத் தயாரிக்குமாறும் ஜனாதிபதி திசாநாயக்க அதிகாரிகளுக்கு உத்தரவிட்டார்.
மேலும், காவல் நிலையங்கள், மருத்துவமனைகள் மற்றும் பிரதேச செயலகங்கள் உள்ளிட்ட பொது இடங்களில் மாற்றுத்திறனாளிகளுக்கான அணுகல் வசதிகளை
மேம்படுத்துவதற்காக ரூ. 283 மில்லியன் மதிப்பிலான திட்டங்கள் செயல்படுத்தப்பட்டு வருவதாகவும் அதிகாரிகள் கூட்டத்தில் தெரிவித்தனர்.
